Жеңіс жолында

4 мамыр 2026 жылы  Абай облысының мәдениет, тілдерді дамыту және архив ісі басқармасының «Абай облысы мемлекеттік архиві» КММ-не  (АОМА) Абай облыстық білім басқармасының «Электротехникалық колледж» КМҚК студенттері іс-шараға келіп қатысты.

Қонақтарға ҒАА және құжаттарды пайдалану бөлімінің археографы А.Е.Шалыгин «Путь к Победе» атты дәріс оқыды.

Семей облысының еңбекшілерінің Жеңіске қосқан үлесіне ерекше назар аударылды, олар «…1941 жылдың 1 желтоқсанында елдің қорғаныс қорына 2.741.000 рубль сомасындағы ақшамен, ауыл шаруашылығы өнімдерімен, құндылықтармен және өз жалақысынан аударыммен, 7.250.000 рубль сомасындағы облигациялармен және 981.000 рубль сомасындағы кепіл түбіртектерімен тапсырды. Кеме жөндеу-кеме жасау зауыты комсомолшыларының күшімен 40 тонна қара және түсті металл сынықтары жиналды, 4 жексенбілік өткізілді, түскен қаражат қорғаныс қорына аударылды».

Семей Қазақстанға эвакуацияланған жеңіл және тоқыма өнеркәсібі кәсіпорындарының үштен бірінен астамын қабылдады. Донбастан эвакуацияланған Володарский атындағы тігін фабрикасының негізінде қысқа мерзім ішінде әскери киім-кешек өндіру ісі жолға қойылды. Жергілікті ет және тамақ өнеркәсібі кәсіпорындары майдан мұқтажы үшін жұмыс жасап, жауынгерлерді азық-түлікпен қамтамасыз етті. Соғыс жылдарында Семей іс жүзінде әскерді тамақтандырып, киіндіріп, Қызыл Армияның жауынгерлік қабілетін қамтамасыз етудегі маңызды буынға айналды.

Семей облысынан майданға 93 мың адам аттанды, олардың 44 мыңнан астамы жеңіс жолында өз өмірлерін құрбан етті.

Студенттерге 1945 жылғы 24 наурыздағы КСРО Жоғарғы Кеңесі Президиумының А.А. Ибраевқа Кеңес Одағының Батыры атағын беру туралы Жарлығы, Ұлы Отан соғысына қатысушылардың орден кітапшалары мен ордендері, штурман И.А. Соколовтың жеке ұшу кітапшасы, Қызыл Армия офицері В.С. Вернигоровтың мүлік (киім-кешек) кітапшасы, майдан хаттары, 1941 жылғы 22 маусым мен 1945 жылғы 9 мамырдағы газеттер көрсетілді.

Сондай-ақ қонақтардың назарына Жеңіс күніне орай дайындалған екі фотоқұжаттық көрме ұсынылды.